Polşanın Bıqdoşe şəhərində ölkənin mərhum prezidenti Lex Kaçinskinin xatirəsinə həsr olunmuş 7-ci Beynəlxalq Şahmat Festivalının çərçivəsində keçirilən qadınlar arasında turnirə yekun vuruldu.
Chess.az xəbər verir ki, son tura vahid lider qismində girən həmyerlimiz Günay Məmmədzadə yarışın son turunda güclü ukraynalı rəqibi Mariya Muzıçyukla bərabərə qalaraq turnirin qalibi adını qazandı. Altı xalla birinci olan Günayın ardından 5.5 xalla Polşanı təmsil edən Alina Kaşlinskaya və bolqar Antoaneta Stefanova müvafiq olaraq 2-ci və 3-cü yerləri tutublar. Günayın qazandığı qələbə onu dünya reytinq sıralamasında da xeyli qabağa aparıb. Belə ki, bu yarışın nəticələrinə uyğun olaraq öz reytinqinə 11.3 punkt əlavə edən Məmmədzadə, ELO balını 2466 xala çatdıraraq qadınların dünyada reytinq sıralamsının 27-ci pilləsindən 21-ci yerə yüksəlib.
4-07-2022, 16:48